| SINT-DJILAIN 2014 : EL PETIT MOT DU MATIN pa Pascal Decamp |
| Les autes côps, dj'ai d'jà parlè des trwès compagnies. Asteûr, djè m'seûs rindu compte què nos avons ène sôte di mârcheûs uniques au monde. Dj'ai dit "mârcheû" èyè nin "routeû". Les routeûs, c'est pou les Godasses dè Fraire. Rossi, à Sint-Djilain, on n'route nin, on mârche. Mais alléz d'mander à Paris, au Québec ou bin au Congo ou bin n'impôrte ayu s'i sâv'nut c'qui ça vout dire mârchî à tch'vau, ils n'compèrdront rin. Mârchî à tch'vau, i gn'a qu'dins no région qu'on fait ça. C'est l'vrai qu'ils ont raison : c'est d'jà pa côp malaujî di mârchî à pi, èyè ça donne des cloques. Ils èspaugn.neut çoulà. Mais i-z-ont p'têt' des autes maux què lè lieu où ç'qu'on est m'èspétche di lomér. D'ostant pu qu'i faut yèsse castard, savèz, pour mârchî à tchfau ; mi d'ai d'jà asprouvè, d'n'ai nin réyussi. Choûtèz : ène mwain pou t'nu l'bièsse, ène mwain pour t'nu l'sâb', èy' ène mwain pour t'nu l'vèrre : ça n'èst nin donnè à tertous, savèz çoula ! El cavalérie, c'èst l'biatè d'èl marche. Waitèz : ène dècharge, avou les command'mints à tch'vau. D'ailleûrs, quand c'est fini, tertous dij'neut : ça, c'èst-one bèle, èy' on nè l'rovîye nin. I gn'a ètou des tch'faux spéciaux : les céns d'nos |
artilleûs è d'nos canoniers, qui sont v'nus comme chaque annèye avou leû Citroène. N'avèz nin vu èl Citroène dè canoniers ? Pourtant èl canon il est satchi pa ène deux-tch'vaux. Rén n'arrête èl marche. Rén. Mais, quand l'tchèvau dècid' dè s'arrêter pou s'souladjî, tout l'monde ratind, même saint Djilain. C'est quand même èle seûle bièsse qui dj'connais qui fait s'commission en musique. Ça m'fait sondjî à l'dérènne Sint-Djilain à la r'mîje dès mèdaîlles. Dji cacheu après m'cantinière, èyè tout d'in côp, j'ètinds rire padrî mi. Djè n'vwè rén au preumî côp. Ey' après çoulà dj'ètinds "Hé cantonniè, cantonniè". Dj'è mè r'toûne : c'é in tch'fau qui m'pârleu. Mais i n'faut nin s'è sbarér hein : saint Françwès pârleut aux leus, saint Antoine auz-è pèchons, djè pou bén pârlér avou lès tch'faus ! Eyè djè lî d'mande : "Pouqwè c'qui vo riyèz m'gamin ? — Bè pasquè, disti, dji sondje à tout l'ouvrâdge què vos allès awè dmwain à cause dè nos-autes, dè tout c'qu'on va lèyî l'long dès vôyes". Oh djè n'ai nin stî mwais, après tout ça pôte bonheûr, èyè c'est sign' dè liards. Adon tout va bén puisqu'i m'd'è faura pou payî les cantinières. Bonne Sint-Djilain à tertous ! |