| SINT-DJILIN 2012 : EL PETIT MOT DU MATIN pa Pascal Decamp |
| Les autes côps, dj'é dèdja pârlè des trwès compagnyies dè Frère, mins vo savèz bin qui gna ène quatième ? Djè sé bin qui èle nè dèfil' nin come les autes, min èle est bin la, èyèt, sins lèye, no Sint-Djilin ni s'reut pu l'minme : c'est l'rédjimint des feumes dè marcheus, què' ç'qu'on freut sins les feumes ? I n'faut nin daler lon pou sè rinde compte : qui ç'qu'a rassonrè l'maujon, fé les carreaux, les commissions, cû les tautes... ? Oh, qu'jè sé bin qu'on a fé s'paurt ètou, èyèt, qu'intrè l'èrmije dès costumes èyèt l'barbecue, on s'a dispètchi dè tonde èl pachi, mins pou l'restant ? Lès feumes, c'est capital pou l'rèussite d'èle Sint-Djilain ; dèdja l'dimègne au matin quand èle ravey'nut l'ârmèye. Èl sèmdi après diner, on asteut franc battant deus heures pu timpe dissu place, mins, quand on a r'mouchi au nut, bramint ont fé come Napolèyon : on est saudard ou on n'l'è nin ! L'empereur à Waterloo n'a nin daurmu avou Marie-Louise dins in palès. Nos autes, a Sint Djilain, on a fé l'minme, on a daurmu tout seu, dins l'divan, èyèt tout abyï, c'qui a bin fé rire les feumes. - "Dijèz Zénobe, vos avèz stî coutchî avou vos guêtes pou awè pu aujie, mais comint dalez fé asteure pou candji d'culotte ?". L'armèye s'lève : - "Dji n'saveus pu qui ç'asteut si deur. M'tiesse ! Mon Djè, eyu ç'què djé mètu m'colback ? Euphrasie, cachèz après l'numèro da Paulette : djé roublyî m'colback dèssus l'tâbe du fond ! " - Dissu s'timps-la, au vijin, on sonne dissu l'gsm da Maurice : - "Maurice, ayèr au nut, djé stî fé m'commission didins l'cabinet en plastic èyèt djé lèyi m'fusike conte èl meur. Vos n'l'avèz nin r'trouvè ?". Paulette èyèt Maurice ont tout r'trouvè. N'pinssèz nin qui z'expos'neut pou ène brocante au matin, mins y z'ont rindji toutes lès afères pièrdues pou lès rinde pu aujîmint. A 4 heures, c'est aute chose : |
Les 24 heures du Mans dèssus l'place d'èle Maroquette. I gna ène afère comique lauvau : quand les adjudants cryî'nut : « En place repos », tout l'monde court come aux 24 heures du Mans pou awè l'pole position : on broke dins les maujos, pa l'huche, pau djardèn, pau garadje, pa l'pîssinte dè drî, pou yèsse al première place : è l'tchèyère padvant l'assiette à vitoulets. En s'achidant, on rumine - "Djè n'sins pu mès djambes". Tout tchute, èle feume dèl maujon arrife : - "Voulèz ène pètite chope ?". A m'idèye, l'houblon dwèt yèsse bon pou lès articulâtions ! Djé trouve qui lès mèd'cins devrun't nos prescrire 4 batchs di Jupiler par samwène, 2 verres toutes lès trwès heures come pou les antibiotiques, ça s'reut radical ! Oyi, djè trouve qu'on d'vreut donner des mèddayes aux feumes, pasqu'elles sont toudis la, dins l'ombe, prèsses a no s'couri. Djè wès dèdja l'afère : "Euphrasie Pauchet, 20 anèyes di marche. Elle a cû 1.932 ous. Elle a fé 1.876 vitoulets en wétant Dallas èyèt Docteur House. Elle a commandè 196 tautes èyèt r'çu 176 saudards a dinner. A midi, elle a ramwinè tout l'peloton dè s'n'homme dins s'n'auto, èyèt en in côp : èl pus p'tit dins l'bwèsse a gants èyèt les trwès gros au tape-cu qu'asteut lèyi drawu. Elle a donnè quate bwèsses dè Dafalgan èyèt 61 Imodium. Elle a r'keudu 11 boutons èyèt r'poli 44 culottes. Elle a r'passè 748 boutons au Sidol èyèt les aigles des tchapias, ç'qui fé qu'es’ n'homme èrlujeut toudis èyèt qui c'est grâce a çoula, qu'ène anèye, elle l'a r'trouvè qui s'asteut pièrdu dèssu l'voye dè Tchèstrèt. Oyi mes amis, sans les feumes on n'est rin. Èyèt l'mârdi termètant qu'on va r'paurter s'costum' èyèt vûdi les futs, elles ont tout r'mètu d'allure èyèt tout rassonrè. On va lyeu fé in gros bètche èyèt les r'mercyî bin fwart. Bonne Sint-Djilin a tertou. |